Umlando Wethu

Umlando omfishane ngesizwe sakwaCebekhulu

Cebekhulu! Mzimba! Gobo! Nomageje! Khuzwayo! Mkhonto! Bizo, Lindamkhonto

Cebekhulu
INkosi uNsikayezwe Cebekhulu

ISIZWE sakwaCebekhulu esibuswa nguMntwana uNsikayezwe  kaT J Cebekhulu kaMkhonto kaBizo sinomlando omude wamaqhawe. Ukhokho wabakwaCebekhulu nguKhuzwayo igama lakhe. Wayakhe umuzi wakhe waseMaxasheni eduze komfula iMfolozi eMhlophe phesheya kwentaba iNhlazatshe ngasesandleni sokudla uma uwela iMfolozi eMhlophe ubheke edolobheni laseVryheid. UKhuzwayo wazala uNomageje yena owazala uGobo ozala uMzimba.

Ngaleso sikhathi laba bantu babaziwa ngokuthi bangabakwaLinda. Babengakabizwa ngoCebekhulu okuze kwenzeka ngesikhathi sokubusa kweNgonyama uCetshwayo kwaZulu. Ngakho-ke ezithakazelweni zabo kuthiwa bangoLindamkhonto. ULinda kaMafu kaThinta kaDidiza kaWombe kaMandlana kaNkomozana.

Ukuthi babizwe ngoLindamkhonto kususelwa ekuhlomeni kwabo ngemuva kokuzwa umbiko owawuthi izinkomo zazidliwa yizilwane. Kwathi-ke uma bezwa lowo mbiko bahloma baphelela baphikelela endle lapho okwakuthiwa umonakalo wawenzeka khona. Kuthe uma befika lapho bathola ukuthi lowo mbiko wawulihaba nje. Akukho zinkomo ezazidliwa yisilwane. Yingaleso sizathu babizwa ngoLindamkhonto kuqondiswe ekutheni kuhle imikhonto yabo ihlale ilindile ingasheshe ithathwe kuhlonywe.

Ngokungena kweNgonyama uShaka esikhundleni sobukhosi kwaZulu kwaqala umshikashika wokuhlanganisa izizwe zamaZulu ukuba zibe yimbumba ukuze zizobhekana kalula nabahlaseli babelungu abase bevele beqalile ukuhlasela amaXhosa phesheya kweNciba ngowe -1778. Kulezo zimpi zokuhlanganisa amaZulu uMzimba kaGobo okubutho lakhe kwakuliWombe walwa ngobuqhawe obukhulu. Ngenxa yobuqhawe bakhe iNgonyama uShaka yamkhuphulelela esikhundleni sokuba yinduna yebutho lamaWombe. Kulelo butho kwakukhona abaNtwana abaningi baseNdlunkulu oMaphitha, Dingane, Mpande, Mhlangana nabanye abaningi. Ngakho-ke uMzimba wayeyinduna yebutho elibaluleke kakhulu ngesikhathi sokuhlanganisa uZulu. Waxoshiswa ngezinkomo eziningi uMzimba wagcina eyisicebi, efuye kakhulu.

Ngokuhlonipha amagalelo okuhlabana kwakhe uMzimba ezimpini zokuhlanganisa amaZulu, iSilo uShaka sambeka ukuba abe yiso laso esifundeni saseBabanango. Wafika kuleyo ndawo waphatha isizwe ngobuqotho obukhulu. INgonyama uShaka yaphinde yamkhuphulela eliphezulu. Yamjuba ukuthi ayokuba yiso layo esifundeni saseMatigulu. Leso sifunda sasikade singaphansi kweNkosi uPhakathwayo kaKhondlo kaMncinci kaLufutha wakwaQwabe.

Indawo yakhe yayihamba ize iyofinyelela eMatigulu engakanqotshwa wahlanganiswa noZulu wonkana yiSilo uShaka.

UMzimba ufika lapha eMatigulu nje usenemfuyo eningi. Umhlambi wezinkomo ayezixoshiswa yiNgonyama uShaka ngobuqhawe bakhe nobuqotho bakhe esizweni sakwaZulu. Ngokubona ukwanda nobuningi bemfuyo yakhe iNgonyama uShaka yancoma ukuthi uMzimba ayokwakha endaweni ephakathi kwemifula uMhlathuze neNseleni, iningi layo kusukela ngonyaka we 1902 -1904 weKhomishane kaCharles Saunders eyaqola izindawo zamaZulu enyakatho yoThukela noMzinyathi yazinikeza abelungu, leyo ndawo isingamapulazi abelungu, abakwaCebekhulu sebexhobelene ekhoneni elingasho lutho. INgonyama uShaka yayincome ukuthi uMzimba akhe phakathi koMhlathuze neNseleni ukuze umhlambi wezinkomo zakhe uthole indawo eyanele yamadlelo.

UMzimba-ke wakha kule ndawo ephakathi kweNseleni noMhlathuze kwagcina kwenzeke isimanga emfuyweni yakhe. Kwakunenkomo eyayithi uma ikhala izulu lisibekele ngamafu ligcine liyidliva imvula kugcwale imifula. Ngenxa yalesi simanga abantu abaningi kwaZulu baze bathi unemilingo, kungenjalo. Lokhu kwaqhubeka ukwenzeka ngisho sekubusa izingonyama oDingane, Mpande noCetshwayo.

NguMzimba owalanda uMntwana uMkabayi wambeka endaweni eyayikade ibuswa nguNzwakele owabulawa enqineni mbumbulu ngoba kuthiwa ufihle indlalifa kaShaka uZibizendlela. Kuthe uMzimba esehambile emhlabeni, isizwe saholwa nguBizo.

Nangesikhathi sikaBizo isizwe sakwaCebekhulu sasilokhu simbandakanyiswe nokuna kwemvula ngenxa yenkomo yezimanga. Kuthe ngesikhathi seNgonyama uCetshwayo kwavela indoda esizweni sakwaCebekhulu uSomanxiwa kaKalomageje kaGaqa Khoza owayekwazi ukwenza imithi yakhe imvula ine. Ngakho-ke iSilo uCetshwayo sacela ukuba ayinise. Ibutho likaSomanxiwa kwaku uDloko. Wacela ukuthi alethelwe izinsizwa ezine kuye. Kwalethwa: uNjakadamsiya kaSomopho Mthembu, uMahunqu kaMkokwana Zungu, Masusimpisi kaMndlovu Khoza noBikwayo kaLoziwawa Ntuli. Wathatha lezi zinsizwa ezine waya lapho kuhlangana khona yonke imifula esifundeni: iNseleni, iMbabe, iPose, iCwaka, oKhula, iNtiwe noMhlathuze. Le mifula yayihlangana endaweni kaJokozela kaMdlekezana Mthiyane.

USomanxiwa watshela iSilo uCetshwayo esasiseMangweni ngaleso sikhathi ukuthi ucela kulethwe inkunzi emnyama bhuqe, ithathwe kweminye yemizi yeSilo uCetshwayo oDwini. Nempela lokho kwenziwa. Waphinde wacela ukuthi kulethwe inqama emnyama bhuqe ilandwe emzini weSilo uCetshwayo kwaGobuphondo. Inkunzi yenkomo emnyama nenqama yemvu emnyama kwaqhutshwa kwayiswa lapho kuhlangana khona imifula. Kwathi inkomo isadla nje utshani inqama yabanjwa uSomanxiwa kaLomageje wathi mayihlatshwe ibulawe ngezandla. Kwathi isibulewe wayihlaba ngasesandleni sokunxele. Wakhipha umsila, isibindi nenyongo ukuze azokusebenzisa emthini yakhe. Watshela abantu ukuthi balethe inkunzi yenkomo emnyama kuye. Inkunzi eyayikhethiwe yayingenalo ulaka kuyinkunzi ezithulele engethuki. USomanxiwa wayephethe umkhonto wokugwaza ayewulolile. Waya enkunzini wayiphulula kwathi ingazelele wayigwaza ohlangothini langakwesinxele ngokuyela emathunjini amancane. Inkunzi yawa ngokushesha yafa. Wayivula isikhumba wakhipha isibindi nenyongo.

Ngemuva kwalokho wathatha izibindi zombili, esenqama nesenkunzi wazichoma endukwini kwesinye isandla waphatha ighaga elingenalutho wayongena nakho esizibeni esimnyama esasigcwele izingwenya nezimvubu. Wangena esizibeni isikhathi eside kakhulu kangangokuthi ababengaphandle baze bacabanga ukuthi wayesedliwe yizingwenya. Amanzi esizibeni aze acweba kwabonakala izingwenya zintweza kanye nezimvubu zikhala. Ngemuva kwesikhathi eside wezwakala ekhoneni lesiziba uSomanxiwa Khoza esethi: “kubili kunye nje.” Wabhukuda ephethe ighaga ayengene nalo ligcwele udaka waqonda lapho abantu babeme khona phezu kwesiziba. Ngenkathi eqonde kubantu ehlamba ingwenya yaya kuye. Waphinde wantshumpa wagcina eseqhamuke eduze kwalapho abantu babeme khona phezu kwesiziba ethi: “kubili kunye nje; nganginenhlaba; kayi khuhli”. Lesi kwakuyisaga sebutho uDloko uSomanxiwa owayelilungu lalo.

Ngemuva kwalokho uSomanxiwa waphuma esizibeni wayala abantu ukuba balethe zonke izingane zamantombazane nezabafana ezazingakathombi, kanye nazo zonke izalukazi ezazingasayi enyangeni kanye namaxhegu. Bonke batheleka. Kwakudingeke badle inyama yemvu nenkunzi emnyama okwakubulewe ngenkathi uSomanxiwa engakangeni esizibeni. Inyama yenkunzi yakhishwa izitho ingahlinzwanga isuswe isikhumba yadliwa yaphela. Kwahlalwa izinsuku ezimbili lapho kuhlangana khona imifula imvula ingakani. Ngosuku lwesithathu lana kakhulu laqhubeka nokuna ngenkathi abantu sebeya emakhaya. Akekho owangabaza ukuthi uSomanxiwa wayeyinisile imvula okuyinto abakwaLindamkhonto ababedume ngayo.

Kungalesi sizathu iSilo uCetshwayo sabaqamba igama lokuthi bangabakwaCebekhulu. Isilo sasingalingabazi icebo labo lokuletha imvula eyayigcwalisa imifula lalilikhulu futhi liyisimangaliso ngenkathi sibaqamba lelo gama okwagcina kuyisibongo sabo.

Umphumela wempi kaZibhebhu noSuthu 1882-1888

Ngenkathi kubheduka impi phakathi kukaZibhebhu kaMaphitha Zulu owayesetshenziswa ngamaNgisi, amakhosi amaningi kwaZulu ehlukana phakathi. Amaningi awazange amsekele uZibhebhu ngoba ayebona ukuthi wayesetshenziswa yisitha. KwaCebekhulu kwakubusa iNkosi uBizo okwathi uma amaNgisi emcindezela ukuthi eseke uMandlakazi wagcina evumile kanti ukakwe ngamakhosi ayevutha uphondo eqotho kakhulu endlunkulu kwazise isigodlo saseMangweni seSilo uCetshwayo ngokwaso sasifaka ugqozi kubantu abathanda izwe labo. Ngakho-ke isizwe sikaBizo saklayeka phakathi. Lokhu kwenziwa ukuthi UBhejane Khoza wayekade eyinceku yeNgonyama uCetshwayo esigodlweni saseMangweni waqhubeka noma sekuphethe iSilo uDinuzulu wabamba iqhaza ezindabeni zasendlunkulu.

Kuthe uma kubuyiswa iSilo uCetshwayo ekudingisweni e-Oude Moulen mhla zingama 29 kuMasingana  ngowe-1883, uMbuso wamaNgisi wexwayisa uBizo ukuthi ngenxa yokuthi yonke indawo eyayiphakathi koMhlathuze neMfolozi eMhlophe yabe isinikezwe iSilo uCetshwayo, uBizo wayengaba sengozini yokubulawa ngabantu abawuSuthu. Welulekwa ukuthi ayokwakha endaweni eyayingaphansi kukaJohn Dunn phakathi koThukela noMhlathuze. Wahlala kuleyo ndawo waze wabuya ngonyaka we-1888 yonke indawo esenyakatho yoThukela noMzinyathi isifakwe ngaphansi koMbuso wamaNgisi.

  • Lo mlando ucashunwe encwadini: Umlando Wamakhosi Esifundazweni saKwaZulu, Umqulu 1. Uma ufisa ukuthola le ncwadi enothe ngomlando wezizwe ungabhalela uSolwazi Maphalala kule email: maphalalajs@vodamail.co.za;  noma ushayele kulezi zinombolo: 082 730 5782 noma ku-083 548 1918

Show More

Related Articles

Close